Tradizionale Fiera d'ottobre - PRO LOCO DI NOVENTA PADOVANA

Vai ai contenuti

Menu principale:

Manifestazioni

VECIA SAGRA DE NOVENTA

di Bepi Missaglia


Folpi caldi, masenete,
i maroni grossi bei,
pevarine e le favete,
tiramola par putei

Nose mandole co' i fighi,
pomi cachi bei grossi,
cuchi e cuche, mile intrighi
e de zuca te t'ingossi.

Mandolato caramelle,
masteloni, mastelete,
balonsini, girastele
subi pifari e trombete.

Stalo grando par cavai,
e custodia biciclete,
vin spinà dentro i bocai:
Vegna vin ca semo in sete.

Toni bevi anca 'sto goto
pago mi! Mi no ghe bado,
go anca el  pan che xè biscoto
co' na feta de salado.

Giostra fata co' peà
l'oto magico volante,
el casoto novità,
giostra d'auto gigante.

Tiri a segno co' i piumini,
tiri a colpi che fa bumm,
tiri a foto co' i balini,
el casoto turuntumm.

Circo equestre co' la banda,
balo fato in piantaforma,
una pesca tanto granda,
l'organeto co' la Norma.

Altalena co' barchette,
do cavai tacà 'na grupia,
qua le nove cansonete
e n'armonica che supia.

Xente tanta e tanta ancora,
done, omeni, putei,
dapartuto: salta fora
come nuvole de osei.

Tuti magna par le strade,
fava nose e castagne,
despensando le peade
su le piante... pore cagne.

Camminando co' fa ochi
i se scontra co' sfiancà,
ma no i bada, i perde i tochi
de la roba zà magnà.

I gramofoni sofiosi
i te spaca recie e testa,
ma i xe tuti rumorosi,
per passare 'sta gran festa.

Dopo i torna tuti a casa
imbriaghi ben pasui,
c0' la pansa sgionfa rasa,
duri strachi co' fa mui.

Ma contenti par dei mesi
torno al fogo de polenta,
i pensava ai soldi spesi
a la sagra de... Noventa.
 
Copyright 2015. All rights reserved.
Torna ai contenuti | Torna al menu